ЈОУ Библиотека „Искра“ – Кочани ги прогласи најдобрите читатели во категориите возрасни и деца, а во пресрет на одбележување на 23 Април, Светскиот ден на книгата и авторското право.
Во категоријата деца, за најдобар читател е прогласена Анастасија Хаџипаунова, додека во категоријата возрасни, Стојка Гајдук.
Годинава е воведена и нова категорија – највозрасен почесен читател при што награда беше доделена на 86 – годишната Бисера Наумова која редовно чита и позајмува книги во „Искра“.
Како критериум за доделување на наградите е бројот на прочитани книги во годината и редовноста во нивното враќање.
– ЈОУБ „Искра“ во Кочани, во пресрет на 23 Април, Светскиот ден на книгата и авторското право, традиционално реализираше настан посветен на чествување на книгата, авторите, читателите и издавачите. Традиционално ги прогласивме најдобрите читатели во 2023 год. во три категории на деца, возрасни и новата категорија највозрасен почесен читател. Читавме пораки посветени на Светскиот ден на книгата, а воедно, членовите на ЛК „Копнеж“ ни приредија литературно читање на лични творби, напишани и содржани во најновиот билтен посветен на Светскиот ден на книгата и авторското право, истакна Кристина Горгиевска Атанасова, директорка на „Искра“.
Светскиот ден на книгата и авторското право за прв пат е прославен во 1995 година, назначен под покровителство на УНЕСКО. Датумот има за цел да ги промовира книгите, да укаже на заштитата на авторското право и да ги поттикне издавачите.
И. Матеничарски
