Библиотека „Искра“ со низа активности го одбележа Меѓународниот ден на литературата за деца

ЈУ Библиотека „Искра“ Кочани денеска со низа активности го одбележа Меѓународниот ден на литературата за деца, кој поради коронакризата, наместо на 2-ри Април годинава, беше одложен и одбележувањето се одржа денес.

На манифестацијата „Фестивал на децата, книгата и музиката“  во дворот на библиотеката „Искра“  беа доделени благодарници на поддржувачите и помагатели на работата на библиотеката. Благодарница беше доделена на Општина Кочани, а ја прими градоначалникот Николчо Илијев, како и на Ротари клубот и Ротаракт клубот Кочани-Виница, компанијата Амфенол и Општинската организација на Црвен крст Кочани.

Во рамки на одбележувањето на Меѓународниот ден на литературата за деца  се одржа и трибина на тема „Специфичноста, позитивните влијанија и присутноста на литературата за деца во детскиот развој и во креирањето на детскиот свет“ , на излагачите  Проф. Јованка Денкова  од Филолошкиот факултет при Универзитетот „Гоце Делчев“ Штип, М-р. Татјана Лазарова Осоговска и  М-р. Ели Маказлиева.

Во продолжение на манифестацијата, членови на литературниот клуб „Копнеж“ читаа меѓународни пораки по повод Денот на литературата за деца, а беше промовирано и делото „Мали детски разговори“ од авторот Зоран Пејковски како и книгата „Заедно да растеме“ од Филип Димковски.

Манифестацијата „Фестивал на децата, книгата и музиката“  е проект финансиран од програмата од областа за заштита на културното наледство при Министерството за култура и Општина Кочани.

И.Матеничарски

Фото: А.Арсов

Social media & sharing icons powered by UltimatelySocial