Привршува реконструкцијата на дворот во училиштето „Малина Попиванова“ во Кочани.
Изведувачот на работите, фирмата „Панел М“ заврши со поставување на асфалтот на игралиштата за ракомет и кошарка , а деновиве ќе се постават и спортските реквизити како и исцртување на терените за кошарка и ракомет.
Со реконструкцијата е опфатена вкупна површина од 10 илјади метри квадратни на кој се градат терени за фудбал, кошарка и ракомет, детско игралиште, забавно-рекреативен простор и игралишта за учениците со посебни потреби.
Во рамки на проектот изградена е беседница за настава во природа, амфитеатрално прилагоден терен и патеки. Целта е да се подобрат условите за социјализација и инклузија на учениците и жителите од мултиетничка, мултикултурна и различна социјална средина.
Вкупниот износ на средствата наменети за реконструкција на дворот на училиштето е 3.505.059 денари, од кои 2.700.000 денари обезбедува Швајцарската агенција за развој и соработка преку проектот нa УНДП, „Зајакнување на општинските совети“, а остатокот е учество на Општина Кочани.
Воедно, со средства од буџетот на училиштето во тек е инсталација на ново осветлување на дворот, видео надзор и хортикултурно уредување, се работи и на реконструкција на училишната спортска сала каде се обновуваат ѕидовите, а планирана е замена на подот и прозорците на салата.
И. Матеничарски
Фото: А. Арсов
