Во Кочани започнаа обуките од новиот ЦКА-ПХВ циклус на Црвениот крст

Црвен крст на Р. С. Македонија – Општинската организација Кочани денеска во СОУ „Љупчо Сантов“ ја спроведе првата од предвидените три обуки во рамки на новиот циклус на проектот Црвен крст во акција – Промоција на хумани вредности (ЦКА – ПХВ).

На обуката присутните младинци се запознаа со историјатот, настанокот и дејствувањето на Црвениот крст и Женевските конвенции и протоколи за заштита. Обуката ја следеа 32 младинци од основните и средни училишта од Кочани.

– Младите добиваат обука за вредностите на Црвениот крст, за културата како систем од вредности и како да изработуваат мали проекти за помош во заедницата. Тие ја менуваат својата дневна рутина, поминуваат време во истражувања, активности, промоции, разговори со целните групи, тимска работа со цел изработка на малите проекти и помош на лицата кои се таргетирани од нивна страна, истакнаа од Црвен крст Кочани.

На следните две обуки од циклусот, младинците ќе се запознаат со начинот на изработка на малите проекти и нивното документирање.

Проектот има за цел регрутирање на нови волонтери во Клубовите на млади, а преку изработка на малите проекти се помага и на социјално загрозени семејства и општо добро на заедницата. Крајниот рок за изработка на малите проекти е до 9 мај.

Програмата Црвен крст во Акција- Промоција на Хумани Вредности (ЦКА-ПХВ) повеќе од 20 години претставува национална алатка за регрутирање и задржување на волонтери на возраст од 13 до 17 години во Црвениот крст.

На национално ниво секоја година се изработуаат над 130 мали проекти, се вложуваат повеќе од 25 илјади волонтерски часа, се помага на 2500 лица и се собираат повеќе од 25 илјади евра од заедницата кои се враќаат на заедницата.

Сподели: