Во НУЦК „Бели мугри“ во Кочани денеска беше отворена првата самостојна изложба на графики на авторот м-р Симон Илиев, насловена „Времето раскажува“.
Изложени се 18 графики работени за време и по завршување на студиите на младиот уметник, во техниките литографија, алграфија, сува игла, акватинта и бакропис, дела со мотиви инспирирани од носталгијата на авторот за родниот град Кочани.
-Ова е моја прва професионална изложба откако се занимавам со уметност. Изложени се 18 графики работени за време на студиите и по завршувањето. Изработени се со различни техники, но најмногу е изразена техниката литографија. Сакам да се заблагодарам на Домот на културата, на директорката и на Александра Димитрова која ми помогна во реализацијата на изложбата. Моите планови се да продолжам да создавам нови дела и изложби на повеќе локации во Македонија, истакна авторот Илиев.
Изложбата ќе биде отворена од денес па се до петок во периодот од 08:00 до 16:00 ч. во Центарот за култура „Бели мугри“.
Изложбата е во годишната програма на НУЦК „Бели мугри” – Кочани, финансирана од Министерството за култура на Република Македонија.
И. Матеничарски
Фото: А. Арсов
