По повод една година од стапувањето на функцијата градоначалник, Љупчо Папазов вечерва пред грѓаните на Кочани даде отчет за сработеното во изминативе 365 дена како прв човек на градот.
На настанот Папазов даде осврт на реализацијата на планираниот Буџет за 2022 година, додека повеќе за реализираните проекти говореа раководителите на Одделенијата за урбанизам, јавни дејности и секретарот на Општина Кочани.
Во текот на едногодишниот период реализирани се проекти во делот на инфраструктурата, комуналните дејности, образованието, развој на социјални услуги и сервиси, противпожарна заштита и културата.
Посебен акцент беше ставен на проектот за реконструкција на булеварот „Стево Теодосиевски“ со изградба на нова коловозна лента, улицата „Роза Петрова“ и доуредувањето на Градскот парк. Изградба на дел од потисниот цевковод – Грдовски орман, канализационата мрежа во селото Тркање и атмосферска канализација во Оризари. Препумпна станица во Трајаново Трло, асфалтирање на кружени текови и улици. Комунални активности за расчистување на отпад, подземни контејнери, проекти од општокорисна работа и разовј на социјални услуги преку проектот за грижа во домот „Подвижност“.
– Во Буџетот за 2022 година беа предвидени 265 милиони денари, со денешниот ден се реализирани околу 190 милиони денари, а до крајот на годината има уште еден месец за да се постигне планираната општинска реализација на буџетот со што ќе се создадат услов за проекти во 2023 година. Следната реализација на проекти се однесува за паметно управување со уличното осветлување, опремување на Мултикултурниот центар со тела за ладење и греење како и дигитализација на општинските услуги, истакна градоначалникот Папазов.
На отчетот беа презентирани реализирани активности за доопремување на Територијалната противпожарна единица – Кочани преку обезбедени донации на возила, проект за реставрација на Споменикот на слободата, поддршка за студентите и спортисти и реализирани културни манифестации.
И. Матеничарски
