Граѓаните бараат ослободување на тротоарот од паркираните возила на улицата „Димитар Влахов“

Непрописно паркирани возила, пешаци на коловозот и „диви“ пешачки  премини  e секојдневието на дел од улицата „Димитар Влахов“, на потегот од  крстосницата кај зградата на Фондот за пензиско и здравствено осигурување, па долж улицата.

Пешаците честопати реагираат дека улицата е небезбедна за движење, токму поради возилата кои се паркираат на левиот тротоар од улицата.

Паркираните возила на тротоарот целосно го попречуваат движењето на пешаците, кои наместо на тротоарот , се движат на коловозот или по тесниот тротоар од десната страна на улицата, кој завршува со „див“, необележан и небезбеден пешачки премин.

Тие бараат локалните власти да постават  столбчиња со  кои ќе оневозможи паркирање на возилата на левиот  тротоар, а возачите да се паркираат на обележаниот платен паркинг  на десниот дел од  улицата. Само на тој начин ќе се обезбеди безбедност на сите учесници во сообраќајот  и решавање на проблемот со узурпираниот  тротоар.

„Димитар Влахов“ е една од пофреквентните сообраќајници во централното градско јадро и е важен сообраќаен „крвоток“ во Кочани, поради што,  потребно  е изнаоѓање на изводливо сообраќајно решение на овој дел од улицата.

И. Матеничарски

Фото: А. Арсов

Social media & sharing icons powered by UltimatelySocial