Вчера (4. јули) на Градскиот стадион „Никола Мантов“ во Кочани, сениорската екипа на ГФК „Осогово“ означи старт на подготовките за новата сезона во ВМФЛ.
Точно во 18:00 часот тренерот Кирчо Горгиев ја изврши првата прозивка, па по заедничкиот состанок, веднаш се започна со работа на зелениот терен.
Овој термин за отпочнување на подготовките е релативно во раната фаза со оглед на тоа што имаше голема пауза поради пандемијата со корона вирусот.
Стручниот штаб на чело со Горгиев на кого му асистираат Ангелчо Арсов и Ефтим Аксентиев, како и тренерот на голманите Горан Ѓоргиев на првата прозивка располагаше со 20 фудбалери.
Предвидено е од 20 јули да се замине на висински подготовки во Крушево, но секако доколку дозволат условите поради добро познатата причина.
Веќе се договорени неколку пријателски натпревари, а во следниот период ќе биде прецизиран календарот за одигрување на контролни средби.
