По повод Денот на пролетта, ДГ „Павлина Велјанова“ – Кочани реализираше еколошка акција за засадување на дрвца од страна на дечињата од големата група на Клонот 3 на детската градинка.
Во дворот на градинката, дечињата заедно со своите воспитувачки засадија листопадни и зимзелени дрвца и притоа се запознаа со начинот на засадување, одглдување и важноста на дрвјата во околината во која живеат.
– Еколошката акција за засадување на дрвца ја спроведовме по повод Денот на пролетта. Дечињата засадија листопадни и зимзелени дрвца во дворот на објектот и притоа преку акцијата поттикнавме кај нив да се развива еколошка свест уште од најрана возраст. Во текот на неделава, акции за засадување на дрвца ќе се спроведат и во другите објекти на детската градинка „Павлина Велјанова“, истакна Едита Миткова, директорка на детската градинка.
Од ДГ „Павлина Велјанова“ упатија благодарност до локалната самоуправа на Кочани за поддршката во спроведување на еколошката активност.
И. Матеничарски
Фото: А. Арсов
