Седумнаесетгодишната Моника Миткова, ученичка во гимназијата „Љупчо Сантов“ е избрана за жетварска убавица за 2023 година. Миткова ги освои гласовите на јавното гласање кое годинава се спроведе онлајн, во рамки на 32. издание на културната манифестација „Денови на кочанскиот ориз“.
Од седумте девојки што учествуваа на годинашниов избор, за прва придружничка на жетварската убавица беше избрана Стефанија Соколова, а за втора Ивона Ефтимова.
Крунисувањето на годинашнава жетварска убавица се случи во Градскиот парк на самото отворање на 32. Издание на манифестацијата Денови на кочанскиот ориз. На отворањето му претходеше музички настап на бендот „Nomad“, уличен театар и огнено шоу „Fireter“, а во продолжение на вечерта присутните ги забавуваше бендот „Mal&nov & Special Selection“.
Трите најубави жетварки ќе учествуваат во обичајот зажнејување на ориз што во присуство на делгации ќе се изведе в недела, 1 октомври во селото Мојанци.
Во рамки на манифестацијата „Денови на кочанскиот ориз“, предвидени се низа на настани. Промоции на книги, изложба, празнично дефиле, фолклорни концерти и завршен концерт со настап на изведувачи од македонската естрада под наслов „Македонијо, во срце те носиме“.
И. Матеничарски
Фото: А. Арсов
