Младинците на „Осогово“ победници на Меморијалниот турнир во фудбал „Драганица куп 2021“

Младинската екипа на ГФК „Осогово“ е победник на Меморијалниот младински фудбалски турнир „Драганица куп 2021“  што се одржа денеска на стадионот „Никола Мантов“ во Кочани.

Покрај домаќинот и организатор  „Осогово“,  на турнирот учествуваа младинските екипи до 16 години на ФК „Тиквеш“ – Кавадарци, ФК „Слога Виница“ и ФК„Беласица“ од Струмица.

„Жолто сините“ во финалето ја совладаа екипата на „Тиквеш“ со резултат 6:0. Претходно, за да стигнат до финале, младите фудбалери на „Осогово“ беа поуспешни од  екипата на „Слога Виница“ со резултат од  3:1, додека „Тиквеш“ на пенали (6:5) ја победи екипата на „Беласица“ од Струмица.

Третото место на турнирот и припадна на екипата на  „Слога Виница“ по победата над „Беласица“ од 3:0.

За најдобар играч на турнирот беше прогласен Марио Симоски, најдобар стрелец – Николче Ефремов и најдобар голман – Алекс Андов, сите  од ГФК „Осогово“.

Меморијалниот фудбалски турнир се одржува од 2007 година во чест на една од најголемите кочански фудбалски легенди, Драган Михајлов-Драганица.

И. Матеничарски

Фото: „Комарец

Social media & sharing icons powered by UltimatelySocial