Група граѓани од Кочани од вторник 15 февруари најавија повеќедневен граѓански протест пред фабриката за хартија „Пејпар Мил“ во Кочани. Причина за протестот е чадењето на фабричкиот оџак и загадувањето на воздухот во градот што веќе подолг период, како што велат граѓаните, го предизвикува фабриката за хартија.
Според иницијаторите на протестот, планирано е секој ден, од вторник до петок, во периодот од 16 до 18 ч. да се протестира пред влезот на фабриката.
Во известувањето до медиумите стои:
„Договорено е од 15 февруари, вторник до петок, во периодот од 16 ч. до 18 ч. да протестираме пред влезот на фабриката во Кочани. Протестот уредно ќе биде пријавен до надлежните и ги повикуваме сите граѓани да излезат и да дадат своја поддршка. Конечно треба да се стави крај на загадувањето од фабриката. Ги повикуваме сите институции и надлежни по кој знае кој пат да си ја вршат работата за што се платени и да ги заштитат граѓаните на Кочани од несовесното работење на „Пејпар Мил“, соопштија од организациониот одбор на протестот.
Ова не е прв протест пред „Пејпар Мил“. Граѓаните на Кочани досега неколкупати протестираа пред фарбиката, но очигледно тоа не ги спречи одговорните во „Пејпар Мил“ и институциите да изнајдат решение за проблемот со неконтролираното чадење на фабриката за хартија.
Државниот инспекторат за животна средина досега изврши неколку редовни и вонредни контроли во фабриката кои очигледно не вродија со плод. Поради тоа, граѓаните повторно преку протест ќе побараат изнаоѓање на решение за неколкугодишниот проблем со загадувањето на воздухот во Кочани.
