По повод Меѓународниот ден на жената, 8 Март, на платото пред НУЦК „Бели Мугри“ – Кочани попладнево беше отворена изложбата на цртежи со наслов „Подари цртеж во замена за цвеќе“.
Уметничките дела се изработени од страна на ученици од Училиштето за цртање и сликање при Центарот за култура, на кои се прикажани цветни мотиви според доживувањата на авторот.
-„Подари цртеж во замена за цвеќе“ е проект кој се реализира по втор пат. Целта е по повод празникот на жената да се подари цртеж во замена за цвеќе. Цветот е симбол како подарок за празникот на жената, но учениците со своите цртежи го прикажуваат цветот на свој начин. На некои цртежи се гледа и влијанието од ковид-19, како тие ја доживуваат целата ситуација. Тематика е секако 8 Март, но целта е учениците да ги подарат цртежите наместо цвеќе на свои драги личности – истакна Александра Димитрова, стручен соработник за визуелни уметности во „Бели Мугри“.
На изложбата беа изложени дваесет цртежи кои учениците од школата за цртање ги подаруваа на присутните.
-Изложбата е инспирирана од нашите мајки, од жените во нашиот живот, да твориме и да цртаме за нив и наместо цвеќе, за нивниот празник да им подариме цртеж – рече Благица Стојанова, ученичка во Училиштето за цртање и сликање при „Бели Мугри“.
Со изложбата „Подари цртеж во замена за цвеќе“, ЦК „Бели Мугри“ ја отвора предвидената програма на настани за 2021 година.
И. Матеничарски
Фото: А. Арсов
