Граѓанската иницијатива “Сапорт Кочани” направи нарачка на компресивна облека за повредените во пожарот во дискотеката “Пулс” во вредност од близу 15 илјади евра.
Станува збор за облека која е неопходна на повредените заради побрзо опоравување на лузните од настанатите изгореници.
– Support Kocani ја исплати првата фактура за компресивна облека во износ од 923.458,00 денари – средства целосно обезбедени преку донации.
Компресивната облека треба да пристигне во Кочани околу 16 јуни. Обезбедени се и средства за втора тура компресивна облека, за која на 16 и 17 јуни ќе дојдат повторно експерти од Бугарија и ќе започне процесот на земање мерки, соопштија од граѓанската иницијатива.
Притоа упатија голема благодарност до фирмите Julius Zorn GmbH и Health 2000, кои одобрија попуст од 10 илјади евра и овозможија оваа помош да стигне до што повеќе повредени.
-Иако некои процеси траат подолго додека да бидат завршени, ова е доказ дека кога има волја, има и начин. Ви благодариме на сите вас – граѓани, пријатели, непознати хумани срца – покажавте што значи вистинска солидарност, додадоа од “Сапорт Кочани”.
