Додека најголем дел од централните улици во Кочани вечерва потонаа во мрак, Градскиот парк, ако така може да се нарече просторот што по реновирањето има повеќе гранит отколку зеленило и повеќе личи на плоштад, светна во какво – такво новогодишно руво.
Мерките за штедење на електрична енергија веќе подолг период се применуваат во Кочани и државата, а општините согласно тоа го редуцираат и новогодишното украсување.
Судејки по коментарите на социјалните мрежи, дел од граѓаните се незадоволни од украсувањето на гранитниот парк, додека пак на останатите им се допаѓа скромно закитениот простор и новогодишната атмосфера. Сепак, нечовечки е да се суди пред време и треба да се даде шанса за реализација на замислената новогодишна идила.
А вечерашното светло и мрак во Кочани можеби е и вистинска одлика на атмосферата која владее во градот на оризот.
Град кој во последно време е на врвот на листата на невообичаени кражби, на свои против своите, дрога и дилерство, лихварство и рекетарство, тепачки и насилство и на се помалку позитивни нешта и нешта вредни за споделување.
Среќна Нова 2023!
