Годинашново, 34. издание на манифестацијата „Денови на кочанскиот ориз“ беше симболично одбележување на жетвата на оризовата култура.
На оризова нива на Институтот за ориз, претставници на Здружението на пензионери – Кочани и младинци, членови на ФА „Љупчо Сантов“ од Оризари учествуваа во приказот на обичајот зажнејување.
Со благослов за успешно собирање на родот од оризовите полиња, но без песна и оро, во знак на почит кон починатите во трагедијата на 16 март оваа година – скратеното издание на манифестацијата има цел да ја задржи традицијата во чувањето на културното наследство поврзано со оризопроизводството.
Вршителот на должноста градоначалник на Општина Кочани Венко Крстевски ѝ ја врачи наградата на Ленче Стојанова од Кочани, која Комисијата за избор на најуспешен оризопроизводител ја избра за најуспешен оризопроизводител. Стојанова е регистрирана земјоделска производителка, која во 2024 година има 55 450 кг предадена арпа и поседува 46 ха земјоделско земјиште.
Честитајќи ѝ ја наградата, Крстевски истакна дека таа покажува дека жените оризопроизводителки можат да бидат подеднакво успешни како мажите.
Д-р Верица Илиева, професорка на Земјоделскиот факултет при Универзитетот „Гоце Делчев“ од Штип, го претстави проектот „КАРБОНИКА – Јаглеродна иницијатива за климатски отпорно земјоделство“. Со проектот се развиваат земјоделски практики кои го задржуваат јаглеродот во почвата или ги намалуваат емисиите на стакленички гасови и практики за следење на нивото на складираниот јаглерод во почвата, како придонес во ублажувањето на климатските промени.
