Снег и минусни температури од утрово во Кочани

Врнежи од снег и минусни температури од утрово го зафатија Кочани и околните населени места, по најавите за снежен бран од Управата за хидрометероолошки работи.

Според најавите, снежните врнежи и минусните температури ќе продолжат во текот на ноќта и утрешниот ден. Дополнително се очекува зголемување на дебелината на снежната покривка.

Ниските температури и влажните коловози со остатоци од снег создадоа услови за појава на голомразица на улиците во Кочани.

Екипи на КЈП „Водовод“ од утрово интервенираат на терен, расфрлувајки песок и сол по сообраќајниците низ градот. Се интервенира на улици, мостови, крстосници и угорнини во централното градско подрачје.

Сообраќајот на улиците  во Кочани се одвива во зимски услови по влажни коловози, а се препорачува прилагодена брзина на движење и внимателно управување со возилата.

Патниот правец кон СРЦ „Пониква“  е прооден наместа  со снег на коловозот.

Екипи на ЈП „Македонија Пат“ се на терен и интервенираат во расчистување и одржување на проодноста на делницата.

И. Матеничарски

Фото: А. Арсов

Social media & sharing icons powered by UltimatelySocial