Советот на Општина Кочани ја одржа втората редовна седница, на чиј дневен ред се најдоа 17 точки за расправа.
Советниците ги разгледуваа предлог-програмите за работа на локалната самоуправа по одделни дејности за наредната година како и предлозите за измена на програмите што се однесуваат за тековната година. На дневен ред се најде и точката за ребаланс на буџетот, односно за изменување и дополнување на Буџетот на Општина Кочани за 2021 година.
Советниците ги усвоија предлог-програмата за уредување на градежно земјиште, за изградба и одржување на фекална и атмосферска канализација, изградба на систем за водоснабдување, предлог-програмата за работа во областа на располагање со градежно земјиште и за јавно освлетување.
Советниците донесоа одлука за предлог-програма за изградба на објекти за домување на лица од социјален ризик за 2022 година, изградба и реконструкција на речното корито на Кочанска река за 2022, програма за развој на Кочани за период 2022-2024 и уредување на градежно земјиште за 2021 година. Предлог-програмата за изменување на програмата за изградба и одржување на општински патишта и улици во општината, за изградба и реконструкција на коритото на Кочанска Река за 2021 година, активностите на Општина Кочани во областа на локалниот економски развој за 2021 година и планот на програми за развој на општина Кочани за период 2021-2023.
Советниците го донесоа и ребаланосот на буџетот на Општина Кочани за 2021 година.
И. Матеничарски
Фото: А. Арсов
