Над 120 дечиња и млади утрово учествуваа на Бадниковата поворка во Кочани во рамки на чествувањето на големиот христијански празник – Христовото раѓање Божиќ.
Пеејки ја песната „Вечниот Бог“ и носејки ја пештерата што го симболизира Христовото раѓање, со ѕвезди во рацете бадникарите утрово низ кочанските улици го најавија Христовото рожденство.
Поворката тргна од православниот храм „Св. Вмч. Георгиј“ и продолжи по улиците во централното градско подрачје. На младите бадникарчиња им се придружија поголем број верници и граѓани, по што заедно се упатија пред зградата на Општина Кочани, каде ги пречека градоначалникот Љупчо Папазов со своите соработници.
– Благодарам за овој возвишен чин што го приредувате за нашите сограѓани и што ја продолжувате традицијата што беше воспоставена од неодамна. Посакуваме таа да трае уште долго, а вашите помлади другарчиња и вашите наследници да ја продолжат и во следните години. Нека е за многу години и нека има здравје и среќа, истакна градоначалникот Папазов.
За сите учесници во поворката Локалната самоуправа на Кочани обезбеди коледарски подароци. Манифестацијата се одржува по трет пат, по двегодишен прекин поради Ковид пандемијата.
И. Матеничарски
