Општина Кочани ќе им додели пакети со основен ученички прибор и материјали за следење на наставата на сите првачиња кои годинава за првпат го почнуваат основното образование.
Едногласна одлука за ваквиот вид помош за новите ученици донесе Советот на Општината на денешната седница, откако беше прифатена измената на претходниот предлог да се обезбеди финансиска помош во висина од по две илјади денари за секое прваче.
-Наместо исплата на парична помош, предлагаме да го искористиме склучениот договор за јавна набавка и да подготвиме основни пакети за учениците. Годинава во општината имаме вкупно 327 првачиња и секое ќе добие пакет од Општината, за што ќе се искористат средствата од буџетот што се предвидени за оваа набавка, истакна Дејан Рашков, секретар на Општина Кочани.
Според проценките по предлогот за поддршка на првачињата, вкупната сума што би се потрошила за оваа намена е над 600 илјади денари. Притоа, не беше прифатен предлогот советниците да донираат дел од своите примања што ги добиваат како паушали за ангажманот во Советот.
Според најавите од стручните служби во Општина Кочани, пакетите со прибор за првачињата ќе бидат поделени во почетокот на новата учебна година.
