Театарската претстава „Све о женама“ во изведба на Аматерскиот театар „Мирко Таталовиќ Ќира” од Стара Пазова од Р. Србија ја доби гран при наградата „Васил Ќортошев“ на 63. издание на Драмскиот аматерски фестивал на Македонија во Кочани.
Жирито во состав на актерите Марина Поп Панкова, Никола Кузелов и драматургот Весна Куселска доделија и награди главна женска и машка улога, женска епизодна улога и машка споредна улога, специјалната награда за најдобра претстава во категоријата театар за деца и младинци, награда за истражување нови сценски изразни средства и награда за најдобра режија.
Наградата за женска епизодна улога и припадна на Симона Петрушевсказа ликот на Фјокла Ивановна во претставата „Женидба“, во изведна на Училиштето за театар „Од игра до претстава“, Скопје. Наградата за машка споредна улога ја понесе Мартин Мацкоски за улогата на Козимо во претставата „Перфектни странци“, во изведба на гимназијата „Св.Климент Охридски“, Охрид.
Наградата за главна женска улога се додели на Бојана Урошевиќ, за ликовите Олга, Дада, Јасна, Стела, Лујза во претставата „Све о женама“, во изведба на Аматерскиот театар „Мирко Таталовиќ Ќира“ од Стара Пазова. Наградата за главна машка улога „Никола Димитров“ беше доделена на Видан Станоев за улогата на Трајко Кострежот во претставата „Тестостерон“, во изведба на Аматерскиот театар при Домот на културата во Кавадарци.
На 63 .издание на ДАФ беше доделена и специјала награда за најдобра претстава во категоријата театар за деца и младинци на претставата „Кад бајка постане наша“, во изведба на Драма студио, Ниш.
Наградата за истражување нови сценски изразни средства и експеримент во аматерскиот театар, се доделува на претставата „Грета“ во изведба на Училиштето за театар, Младинска сцена при театарот „Бора Станковиќ“, Врање, Р. Србија.
Наградата за режија „Борис Стојчев” припадна на Андрија Митиќ за претставите „Кад бајка постане наша“ и „Драги дневниче“ , во изведба на Драма студио, Ниш.
Пред публиката во Кочани на фестивалските денови беа одиграни осум претстави на театарски групи од Македонија, од Штип, Скопје, Охрид и Кавадарци како и од Р. Србија, од Врање, Ниш и Стара Пазова како и Р. Црна Гора од Подгорица.
63. издание на Драмскиот аматерски фестивал на Македонија во Кочани беше затворено со претставата „Тестостерон“ во изведба на Аматерскиот театар при Домот на културата во Кавадарци.
И. Матеничарски
